إتصلت اليوم بشركة ليبيا للأتصالات والتقنية للإستفسار عن تقنية الواي ماكس الجديدة ، وأخبرتني أحدى موظفات قسم الواي ماكس انه هنالك المزيد من الوقت قبل أن يكون الواي ماكس جاهزاً للمشتركين ، فهم لايزالون يقومون بتركيب محطات التغطية الخاصة بالواي ماكس ولن ينتهوا قبل منتصف شهر سبتمبر ( الفاتح ) الحالي .
لذا ما لكم سوى الصبر ثم الصبر .. !
الافتتاح حيكون في شهر الفاتح اي اليوم مش معروف توزيع الخدمة على الشركات والمنازل مش معروف الاسعار مش معروفة والصبر يجيبه ربي
يعني ف انتظار الغير معروف ويارب يديرو معروف وبلاش انقطاعات الكونكشن اللي صايرة
بس امانة يا هيثم لو تحصلت علي اي معلومة تقوللنا عليها بخصوص الواي ماكس
تحياتي و تمنياتي بقضاء يوم رمضاني سعيد
الافتتاح حيكون في 16/11وسعرنفس سعر حالي adsl
إنشاء الله ربي يمد في عمري لحد مانشوف خدمة الواي ماكس تخدم في ليبيا 🙂
السلام عليكم ورحمة الله وبركاته
adsl في مصراته موقوف التسجيل البعض عندهم من زمن والان موقفين التسجيل من مدة انشاء الله تطلع الواي ماكس وتكون سريعة وبدون انقطاعات وتكون الاسعار في متناول الجميع والسرعة احسن من الدي اس ال انشاء الله
ياشباب الواى ماكس فيه احتمال كبير ان الاسعار ستكون مابين 30_50 دينار شهريا هدا لقد حصلت عليه من مسؤل فى شركة ltt وكما انى تسنى مشاهدتها تعمل حاليا والسرعة 16 mb عند نفس المسؤل مع التحفظ على ذكرالاسم ولم يذكر لى اى شى حتى البلغ الشهرى لم يحدد لى الا انه مابين 30 و 50 اما سعر الجهاز لم يخبرنى مع العلم انه لا يتعدى 80 دينار بنسبة للاسعار العالمية واما السرعة التجريبية التى كانت فى جهازه المحمول تصل 16 mp يعنى التحميل الصافى كان 2 mb طائرة وليس انترت
لاكن هده السرعة تجربية لهم فقط اما نحن المشتركين فسرعتنا محدودة ولاكنه اعطانى بعض الامل فيها وقال بنسبة للسرعة لن نخيب امل احد اقل تتقدير 512 kb ويمكن 1ميجا او 2 ميجا اما محدودية التحميل مبدئيا يوجد حد وهو اعلى من خدمة adsl ولا يريد التصريح متى واين وكيف ولم يدكر اشياء محددة وكانى اسال على تقنية نووية وليس انترنت الله يشهد على ماقول وانا مسؤل عن كل كلمة قلتها فى هدا التعليق
يديرو واي ماكس يديرو مش عارف شني، أني حنستنى لين تفضى الزحمة.
في الشغل عندي 2 ميجا صافيات وأني المدير متع الشبكة فيعني كل شي تحت إيدي! أما في الحوش فيادوبك نلحق نكمل ال7 جيجا متع الدي إس أل، فيعني إلى حد الآن الواي ماكس مش حنستفيد منها، لكن يالله نتفرجو شن حيصير معاكم!
خاطري نتشمت!! حاس بيهم بيديروها بـ250 دينار إشتراك أولي و50 دينار شهري وسرعة 512 و25 جيجا شهري… مش عارف هكي نتخيل فيها ومن راصي الدوة!
رمضان كريم.
ياقعادكم تغسلوا وتنشروا في ليبيا ماعمرها حاجة جت بالساهل ننين ترقي الظغط و السكر
متشوفوش في الشعب كله ظغط و سكر….سلام
باخى علي الطويل حتى انى انحس انا الاشتراك الاول بيجى غالى وان السرعة مش حتفوت 512 والتحميل محدود 20 او 25 جيجا وكان الله بعون الجميع اما امتى يبدو ربى يكون فى عون الليبين
الخطوط الارضية اغلبها فيها مشاكل يعنى adsl no والواى ماكس تبيلهم سنين تقول يصنعو فى مفاعل نووى ويقولو ركبنا كل الهوائيات والله الا كادابين وشهر الفاتح مستحيل تنزل فيه خدمة الواى ماكس وفيه دوة ان بياجلوه الى شهر مارس وبيفتتح 1 مارس قبل 2 مارس والله اعلم
التقنية نزلت حديثا في السعودية ودورت على الاسعار عندهم ولقيتها اسعار قوية الحق (قوية بشكل سلبي)
هادي اسعار وحدة من الشركات السعودية
التركيب “يعني الاشتراك” 450 ريال سعودي وعلى ما اعتقد 150 دينار ليبي
شهريا 300 ريال سعودي وعلى ما اعتقد 100 دينار ليبي
وفي فلوس تانيات ماعرفتهمش علاش وحتى هما شهريا ممكن 25 ليبيات
المهم كان الحال هكي من توا “باي باي واي ماكس”
ملاحظة : فيه اسعار اغلى وارخص من هكي وكل شركة واسعارها
ملاحظة تانية: انى مش متأكد من الاسعار بالليبي كان تبوا تتطمنوا زيدوا دوروا
احباط
السلام عليكم …
اول حاجة نبي نقوللكم الي يستنى في الواي ماكس راه بيتعب… انسوه لين تسمع بدو الناس يركبو فيه وخليك ب adsl ولا الريفي ولا حتى المدار الناس في العالم التاني واصلة عندهم السرعة لي 4 ميجا والتنزيل نص ميجا في التانية وحني قاعدين نحلمو ب 512 و 1 ميجا والله حاجة تقهر المفروض ليبيا احدث التقنيات فيها واحدث شركات الاتصلات ولكن اصحاب البطون الكبيرة الي يدورو في مصلحتهم بس ويحرمو في الشعب من امكانيات افضل ربي يسامحم وخلاص ما واكلينها غير حني …. المهم الي يسمع معلومة اكيدة علي امته بينزلو الخدمة بالزبط يقول وفكونا من الفتي والدوة الزايدة
كلامك يا عماد عامر مزبوط لاكن انى كل مانحصل فرصة نتلاقى مع واحد يخدم فى ltt عامل والا ادارى نساله على الخدمة يقول قريب قريب كل شى جاهز وفى شهر الفاتح 9 ماتعرفش كيف حتى موقعهم مش كاتبين فيه حتى قريبا او اى شى تهو موقع شركة انترنت ومافيهش تحديتات كيف جت هادى شن هل التخلف الى حاصلين فيه شركة غبية ماعندهاش الا الصبر مش عارف هى شركة تبع للدولة وجماعة كلهم يقولو الواى ماكس بيكون غالى علاش وكل شى من دولة وبيرجع للدولة بعدين الاخ المهندس محمد القدافى قال ان هدا المشروع للبيين وش للربح ولو بتجى للربح هو مش رابح والله ياخ محمد عليك ان تراجع حسابتك او تحاسب المسؤلين على هدا التقصير
بعيد عن الدوة هادي كلها ، عندي سوسة تقول : كيف ندخل ع النت على الكمبيوتر باستخدام الموبايل عن طريق خدمة ليبيانا ؟ سألت الأخ علي الطويل و أجابني مشكورا أنه سيحاول السؤال عن هذا الموضوع و متحشمة منه لأني بنتعبه ، يا ريت الأخ هيثم و أي حد عنده فكرة عن الموضوع يشاركو ويفيدوني .
خوي تحداني إني نقدر نديرها و مهلة التحدي قريب تكمل ، و أني بعيد عن التحدي الفضول بيقتلني نعرف حاجة جديدة زي هادي ، و لما يشغلو الواي ماكس يصير خير بعدين ساهل ، المهم تفاعلو معاي بس .
ممكن بسهولة ربط جهازك بهاتف ليبيانا ودللك بتنزيل برنامج pc suite وهو موجود فى cd الخاص بالهتف الدى تستخدمينه اوصل جهازك بى الوصلة usb تم سيقوم بوصل الجهاز الخاص بك
عندما يتم التعرف على جهازك من قبل البرنامج pc suite اضغطى على خيار connect to the enternet
رقم الاتصال هو #99 اكتيبها من اليمين الى اليسار يعنى اولا مربع تم تسعة تسعة
هدا فقط لاجهزة نوكيا غير دلك لا املك خبرة اد لم تفهمى الشرح راسلينى على
devilsrevolution_m@yahoo.com
أني نعرف إن الحياة كلمة، لكن يا ودي نص هادي مش عارفة ) على فكرة الإسم جدا حلو ( و شكرا على مساعدتك جعلها الله في ميزان حسناتك .
طاب الفروج؟
مزال
خدمة الواي ماكس خدمة خدمة حديدة ورجاء من المسولين في سركةالتعجيل في فتح في اسرع وقت وتكون اسعارة في متنول الجميع وشكراَ
السلام عليكم
أنا خشيت على موقع ltt ولقيتهم كاتبين :(( يتوقع أن تدخل النطاق التجاري خلال السنة القادمة، حيث سيتم تزويد كافة المدن بهذه الخدمة بما فيها من مرافق مختلفة خدمية أو رياضية أو إعلامية، و بالتالي ستصبح جاهزة للاستفادة الكاملة من تطبيقات هذه التقنية على كافة الأصعدة.))
خشو بروحكم و هذي الرابطة : http://ltt.ly/news.php
السلام عليكم ورحمة الله وبركاته
متي تنزل الخدمة
متي بالتحدبد سوف تنزل خدمة واي ماكس
http://www.pg4soft.uni.cc
راجى الواى ماكس لين يجيك من غريان
اسعار زي الفل
اما خير ليبيانا ولا المدار في السرعة امتعت الانتر نت
بصراحه نحن بحاجة الواي ماكس في كل شيء علي الانترنت
بس المهم مايكون الاشتراك غالي
يكفي ثمنه
وبعدين الدوله مستحيل تتقدم اذا كان الغني فقط يستطيع الاشتراك والفقير مثلنا لايستطيع دفع 40 في الشهر
لابد مراعاة اللي حالهم تعبان
او عندهم اطفال ومسؤليه كبيره
انظرنا تقية واي ماكس بفارغ الصبر وسررنا بان الخدمة تبداء من 1/12/2008 وهي حتي تاريخ اليوم 21/11/2008 لم تعرض شركة ليبيا للاتصلات السعر الاشترك في الموقع الخاص بها وعند استفساري عن اسعار الخدمة اتفاجاء بان قيمة الاشتراك هي فقط 500.000د.ل علما بان مصدر هذه المعلومة من داخل الشركة نامل ان تكون المعلومة خطاء
السلام عليكم
الرجاء الانتظار
يتم الان تحميل الواى ماكس السرعة الله أعلم الاشتراك ؟التحميل ؟
استنى وخلاص لين يجى الفرج وربى يصبركم
من اشهر ونحن نتظر الواي ماكس بفارغ الصبر والان لما الحكاية قربت نسمع عن اسعار بارقام غالية هلبة ونحن نتمنى ان تكون هذه المعلومات غير صحيحة ويكون السعر مناسب بحيث تتمكن كافة فئات المجتمع من الأستفادة من هذه الخدمة ومواكبة تطورات العصر
أغرب ما في الأمر أن سياسة خوذ .. والا خلي! هية السياسة المتبعة في بلادنا….فيدفعوك ب4000 دينار لسيارة لاتعرف شنو نوعها ولاحتى أمتى تستلمها!! وهنا بالنسبة لال تيتي ، نفس المنوال، جعلها تتمادى رغم تدني خدماتها والان خدمة الواي ماكس كان الكثير في إنتضارها..حيدفعوك أكثر من 400دينار ومش حتعرف جدواها والا مشاكلها إلا بعد ماترد الشركة رأس مالها ويكون ضرب الفاس في الراس.. بالله سؤال: من المسئول عن هذه السياسات العقيمة التي تنظر فقط لمبدأ الربح السريع ؟؟؟ ولاتكن للزبون بأي احترام؟
المشكله بعد طول انتظار وكترة احلام يطلع سعر المودم وقيمة الاشتراك اسعار سياحية
يقدر على حقها النخبه والنص النص اما المكحت ………..
ان شاء النت السريع يكون مريح للقلوب
انشاء الله يكون سعره مناسب لجميع ومايكون سعر خيالى
انا سمعت بانه يبد الاول فى طرابلس الشهر الجاى اما بنغازى يراجو دورهم لين يفرج عليهم ربى نحنا ديما اخر وحدين فى كل شى
وينك يا واي ماكس الرجو فيك
اين هي خدمة الواي ماكس طال الانتضار وطالة الغيبة ما فيش معلومة لا مصدر رسمي يعطيك معلومة ولا حد بوضحلك شي شنو الحل زعمكم ما ضني فيه حل ويفرج الله ونعم به وعاشت غزة عزيزة وهي تنتفض فوق الاحزان والسلام
انا نبي نفهم حاجة وحدة بس عليش هما ديما إيطولو في المدة كل شهر يقولو لالا أنشاء الله الشهر اللي بعدا حينزل , والله الا تمزيييط أنا بصراحة أكثر حاجة بديت نسمع فيها أنهم يبو يبدو إينزلوه خدمة الواي ماكس يوم 1-2-2009 مشينا يوم 1-2-2009 للشركة قالولي لالا مازال يبو إيزيدوها شهر أخرا يعني لعند 1-3-2009 وااااااااااااو وحق ربي إلا بطئ نين بكل , وبلنسبة للأسعار الأشتراك ب400 دينار , ويبقا معاك لمدة سنة وبعدين كل شهر تبدا تدفع في 40 دينار , والسرعة تقريباً علي حسب ماسمعت 2 جيجا في الثانية وأنشاء الله تنفتح حتي في 1-4-2009 (قاعدين أنراجو) من شهر 9 اللي فات شوي وأنسكرو سنة
انا اشتريت الواي ماكس ونادمة التغطية غير موجودة في منطقتي مع انني داخل مدينة طرابلس غير خسارة فلوس وخلاص .
والله امالا متنفع قرش الله لا يسمحهم كلهم في شركة ل تي تي خسارة غر فلوس
نت ديما معنديش غر واحد شنو يدير يشرك شلتيته او شنو
لا واي ماكس لا بيبسي ماكس خليك ريلاكس وما ديرش حاجه بالعكس بصراحه فساد فلوس ماينفع حاجه..
انا مش مصدقة بعد ماشريته لقيته هكي ..
لان يتغير شئ إلا بعد ان يدخل المنافس لليبيانا والمدار من قبل الشركات الخاصة وهذا لن يكون ولا يحلم به احد الأجراءات كلها امنية متحلمش واجد بيش ما ضيعش نفسك وتوه .